ملتان ( انٹرویو۔ شکیل انجم )
قونصل جنرل امریکہ کرسٹین ہاکنس نے کہا ہے کہ پاکستان اورامریکہ کے تعلقات بہت پرانےاوردیرینہ ہیں۔ جنوبی پنجاب اورامریکہ میں کسانوں کو درپیش زراعت مسائل کے حوالے سے پاکستان اورامریکہ کے زرعی ماہرین ایک ساتھ مل کرکام کررہے ہیں ۔ انہوں نےکہا کہ اس کے علاوہ تجارت ، زراعت اوردیگرشعبوں میں بھی دوطرفہ پروگرامز کے ذریعے دونوں ممالک ایک دوسرے کی مدد کرسکتےہیں ۔ ان خیالات کا اظہارانہوں نے ایکسپریس میڈیا گروپ کو دیئے جانے والے ایک خصوصی انٹرویو کے دوران کیا ۔ انہوں نےکہا کہ ہماری کوشش ہے کہ پاکستان میں نوجوان نسل کو جدید تعلیم کے مواقع مہیا کئےجائیں ۔ اس سلسلہ میں انگلش ایکسیس پروگرام کے تحت 2004 میں شروع کئے جانیوالے پروگرام کے تحت اب تک 27 ہزار سے زائد پاکستانی طلبا جن میں سے 6 ہزار سے زائد کا تعلق پنجاب سے ہےاس پروگرام سے فارغ التحصیل ہوچکے ہیں ۔ تاکہ یہ طلبا دونوں ممالک کیلئےایک محفوظ اورخوش حال مستقبل میں اپنا حصہ ڈال سکیں ۔ جبکہ گزشتہ دو سال کے دوران ہم نے پنجاب میں ایک ہزار سے زائد طلبا کیلئے نئے ایکسس پروگرام شروع کئے ہیں ۔ اس پروگرام میں 400 سے زائد طلبا کا تعلق جنوبی پنجاب کے مختلف شہروں سے ہے ۔ ایک سوال کےجواب میں انہوں نےکہا کہ ہم نےثقافتی تحفظ فنڈ جو کہ امریکہ کا ایک اہم پروگرام ہے کے تحت پاکستان میں تقریبا 35 ثقافتی منصوبوں پرکام کیا ہے۔ جن میں سے ملتان کا گھنٹہ گھر، مزارات وغیرہ شامل ہیں۔ انہوں نےکہا کہ پاکستان میں طلبا کو تعلیمی سہولیات دینےکیلئے پاکستان میں امریکہ نے 19 لنکن کارنرقائم کئےہیں۔ جن کے ذریعے طلبا نہ صرف 3 ڈی ٹیکنالوجی ۔ تحقیقی ڈیٹا بیس کے ذریعے 40 ہزار سے زیادہ تحقیقی جرائد تک رسائی حاصل کرسکتے ہیں۔۔ بلکہ لنکن کارنرپاکستانی طلبہ کو امریکہ میں تعلیم حاصل کرنےکےبارے رہنمائی کے ساتھ ساتھ پاکستانیوں کو ٹیکنالوجی ۔ ثقافتی پروگراموں میں بھی مدد دیتےہیں۔ انہوں نےکہا کہ جنوبی پنجاب میں ایک لنکن کارنربہاوالدین زکریا یونیورسٹی ملتان میں اوردوسرا یونیورسٹی آف ایجوکیشن وہاڑی میں قائم کیا گیا ہے۔
کیپشن:
ملتان: امریکی قونصل جنرل لاہور کرسٹن کے ہاکنز ایکسپریس میڈیا گروپ کو خصوصی انٹرویو دیتے ہوئے ۔۔
